KALIBO, Aklan–Syento porsyento eon nga haum sa pagtao it hugut nga seguridad ro Kalibo PNP para sa nakataeana nga opening of lights sa Kalibo Pastrana Park hinduna nga gabi-i.
Suno kay Police Lieutenant Aubrey Ayon, Deputy Chief of Police for Operation it Kalibo Municipal Police Station nga may igapatuman sanda nga road closure ukon reblocking kapareho ko Opening Salvo it Kalibo Sr. Sto. Niño Ati-atihan Festival 2023.
Raya hay bangud sa ginaeauman nga pagbuhos it maabu nga tawo halin sa nagkaeain-eain nga banwa para saksihan ro okasyon.
Eauman suno kana nga may igaplastar sanda nga Pedestrian Screening Area sa kada kanto.
Ginpadumdum man kara sa mga pumueoyo nga hugut gihapon nga ginabawae ro pagdaea it backpack, armas, mataeom nga bagay ag de botelyang ilimnon.
Ro pagsarado it pilang ka mga karsada sa sadsad area sa palibot it plaza hay maga-umpisa it ala-1:00 it hapon.
