KALIBO, Aklan—Bilang kaparte it pagpahaum sa maabot nga kaadlawan it kapistahan ni Sr. Sto. Niño de Kalibo, hugut nga pagabantayan it Kalibo Police Station ro pagpatuman sa minimum health protocols partikular sa mga debotong maga-agto sa St. John the Baptist Cathedral para sa pilgrims mass.
Suno kay Kalibo Police Chief Major Belshazzar Villanoche sa ginpatigayon nga press conference it LGU-Kalibo, kaibahan sa andang pagpahaum ro pagbutang it mga marka sa guwa it prente it simbahan hasta sa karsada paagto sa kalibo pastrana park.
Kon mapuno suno kana ro 50 porsiyento it simbahan, sa guwa eon ro mga deboto nga magatambong sa misa bilang selebrasyon it Kapistahan.
Pagabantayan suno kana it mga pulis ro mga marka nga ginbutang kun sa siin hay may gintaeana nga mga entrance ag exit points sa palibot it simbahan.
Ginpahayag ni Villanoche nga tuyo kara nga mapabilin ro physical distancing it mga deboto.
Ginpadumdum man nana ro tanan nga magsuksok it face mask ag faceshield kamana man nga ipabilin ro physical distancing bangud nga may peligro pa gihapon nga ginapangatubang ro nasyon tuga it pandemya nga COVID-19.
Samtang, nagapabilin suno kana ro curfew sa mga minors ag mga senior citizens.
Makuntenton eon lang suno kana ro mga raya nga magpamati it misa sa social media, radyo ag cable TV.
Mag-eowas kara may mga misa man sa mga kabarangayan.
