Kalibo Aklan ——–May ginakabig eon nga person of interest ro Kalibo Police Station sa pagpatay sa 22-anyos nga daeaga nga si Nadynne Faith Medina alyas Nadia samtang nga nagapasueod sa eskinita pauli sa andang baeay sa Brgy. Andagao, Kalibo.
Raya hay base sa testimonya it ina ag sambilog sa igmanghud it biktima nga kaibahan nana kat matabu ro krimen .
Ginatutukan ag maid-id nga ginatun-an it mga otoridad ro panaysayon it daywa sa pagpati nga insigidang maresolba ro pagpatay sa biktima .
Kaibahan man sa andang gina-imbestigahan ro sangka tawo nga maeapit sa pamilya nga ginadudahan nga utok sa insidente.
Madumduman nga ginbaril it makatlong beses ro daeaga it owa nakilaea nga suspek samtang nagapauli sa andang baeay halin sa simbahan kun sa siin hay nag-angkon it mga tama it bala sa anang tagipusuon nga naging rason it anang insigidang kamatayon.
Pilang mga basiwo it .45 kalibre nga baril ro narekober sa crime scene .
Insigidang nagpaeagiw ro gunman sakay it nagahueat nga get-away vehicle nga motorsiklo .
Sa pihak nga parte, ginatugyan eon lang ni Mrs. Minerva Medina sa mga otoridad ro pagresolba sa kaso it anang unga .
Samtang, ginpahayag dugang kara nga nasaksihan it Diyos ro mga hitabu ag raya ro maga-giya sa mga pulis agud nga madakpan ro mga suspek ag ro mastermind sa krimen .
Nagapati man imaw nga ginpatay ro anang unga bangud nga makabig raya nga paeag sa kabuhi it mastermind sa oras nga magamadinaeag-on sa anang mga handum ag maga-asenso sa kabuhi.
Maskin nga nagakanugon sa pagkamatay it anang panganay sa batang edad bangud sa anang gina angkon nga kaaeam ag kahugod, nagapati imaw nga may plano ro Diyos sa tanan nga mga natabu.
Nasayuran nga ro biktima hay katatapos eamang sa kursong accountancy ag presenteng naga-OJT sa sangka bangko .
Plano man kara nga mag-eowas nga magabo-oe it board exam para sa accourtancy hay maga-eskwela man imaw it Law, kun sa siin ginasugid nga maabu nga mga tawo ro nagpromisa nga magabulig kana.
