KALIBO, Aklan—May ginatumod eun nga person of interest ro kalibo municipal police station may kaangtanan sa pagbaril-patay sa sangka 41-anyos nga eaeaki sa Sitio Guba, Brgy. Tigayon, Kalibo.
Suno kay Police Lieutenant Aubrey Ayon, Deputy Chief of Police it Kalibo PNP nga may “lead” eun sanda agud nga matumod ro pagkilaean-an it suspek nga may kahimuan it nasambitan nga krimen.
Samtang posible man sigon nga ro mga dating na-imbolbaran karang mga kaso ro motibo it insidente.
Nasayuran dugang nga may mga record ro biktima it alarm and scandal sa andang lugar.
Madumduman nga binawian gid it anang hueam nga kabuhi ro biktima nga ginkilaea kay Jury Felizario ag residente it nasambit nga lugar.
Ginasugid nga naga-init it tubi ro biktima kat gulpi eamang imaw nga ginbaril it owa pa makilaeang persona.
Bangud kara, nag-angkon imaw it lastro sa tuo nga parte it eawas kung siin gilayon man rayang gindaea sa ospital apang namatay samtang ginabueong.
Matapos ro pagpamaril hay madasig man nga nagpaeagiw ro owa pa matumod nga suspek.
Sa makarun hay nagapadayun man ro imbestigasyon it Kalibo PNP sa nasambit nga insidente.
