KALIBO, Aklan—May una eon nga lead nga ginasundan ro Kalibo Municipal Police Station angot sa natabu nga panakawan nga nag-eontad sa daywang ka magkaseparadong establisimento komersiyal.
Suno kay P/Lt. Aubrey Ayon, deputy chief of police for operation it Kalibo PNP nga maskin nga nagapadayun ro andang follow-up operation, apang may ginatutukan eon sanda nga mga indibidwal nga may kahimuan sa insidente.
Pinaagi suno kana sa nabo-oe nga CCTV footage hay naging madali para kanda ro pagtumod sa identity ukon pagkatawo it mga suspek.
Sangka modus man sigon ro gingamit sa pag-atake it ipit ukon salisi gang.
Indi man sigon nanda masiguro kon akeanon ukon taga-ibang lugar ro mga suspek.
Angot kara, ginhinyu ni Lt. Ayon ro kooperasyon it publiko pinaagi sa pangkaugalingon nga pagdahan, pirmeng magpangaman ag maging alerto.
Nag apela man ro kapulisan sa mga tag-ana it establisimento komersiyal nga antes nga magsueod ro mga customer hay paboe-an anay ro andang suksok nga kaeo, face mask ukon sun glasses agud nga ma-capture it andang CCTV camera sa entrance para sa facial recognition.
