KALIBO, Aklan—May person of interest eon ro pulisya sa pagpamaril sa sangka negosyante sa sueod it anang water refilling station bandang alas-7:45 it gabi-i sa Brgy. Estancia, Kalibo.
Suno kay P/Major Bellzhazzar Villanoche, hepe it Kalibo Municipal Police Station nga ginakabig nanda nga person of interest sa pagpatay kay Eduard Alvarez, 50 anyos, tubong Luzon ag presenteng naga-istar sa nasambit nga lugar hay ro sangka eaeaking nakasuksok it itom nga face mask, may taas nga 5’2 ag ginaboeobanta nga mga 26 hasta 27 anyos ro edad.
Palaisipan man sa pulisya kon ham-an nga owa nagbo-oe it anuman nga kwarta ukon gamit ro suspek.
Matapos sigon kara nga tutukan it kalibre .45 nga baril ro negosyante hay nagpangutana raya kon siin ro anang kwarta.
Apang matapos nga pahapa-on hay ginpa-eukpan imaw it daywang beses nga tinamaan sa anang alima ag tiyan.
Insigida raya nga nagpaeagiw sakay it nagahueat nga motorsiklo sa karsada.
Samtang, ginpahayag ni villanoche nga igapaidaeum sa ballestic examination ro mga narekober nga slug ag basiwo.
Padayun man ro andang pag review sa CCTV footage it Brgy. hall it Tigayon nga na-capture ro pagpaeagiw it mga suspek paagto sa direksyon it banwa it Banga.
Ginatumod man kon ro pagbaril sa negosyante hay may kaangtanan sa anang negosyo ukon ro suspek hay may personal nga kaakig kana.
