KALIBO, Aklan—Gin-engganyo it Kalibo PNP ro publiko nga padayun nga magkooperar sa ginapatuman nga health protocol it Inter-agency Task force against COVID-19.
Suno kay P/Maj. Bellshazzar Villanoche, hepe it Kalibo PNP nga sa makarun hay sigidas ro andang pagsita sa pilang ka mga indibidwal nga owa nagasunod sa panibag-o nga ginapatuman it IATF kung sa siin obligado eun nga magsuksok it face shield sa pampublikong lugar.
Raya hay mag-euwas pa sa pagsuksok it face mask kung nagaguwa it panimaeay.
samtang, mag-euwas pa kara, hugot man nga ginabantayan makarun it Kalibo PNP ro pagbawae sa drum beating sa pribado ag pampublikong lugar.
Sapat eamang suno pa kay Villanoche nga maintindihan it mga pomoeuyo nga hugot nga ginabawaean ro pagtieilipon ag pagkinasadya makarun kapareho it nakaugalian nga pagsadsad sa kalye kada magselebrar it Kalibo Sr. Santo Ninio Ati-atihan festival.
Samtang sa pihak nga parte, gineaygayan man ni P/Maj. Villanoche ro mga katapo it kapulisan sa Kalibo Pnp nga pahabaon permi ro andang konsensiya samtang naga-atubang sa publiko.
Raya hay matapos nga naging kontorbersyal si P/SMSgt. Jonel Nuezca nga naboe-an pa it video samtang ginabaril ro mag-ina sa atubang it maabong tawo kaibahan ro anang unga sa Paniqui, Tarlac.
