KALIBO, Aklan—Nagapadayun ro imbestigasyon it Kalibo Municipal Police Station angot sa mga insidente nga nag-eontad sa pilang lugar ko mga nagtaliwan nga adlaw.
Madumduman nga ko Pebrero 6, nagreklamo ro sangka ginang matapos nga mabiktima it budol-budol sa sueod it sangka mabahoe nga mall sa Roxas Avenue Extension, Brgy. Andagao, Kalibo.
Suno kay Police Lieutenant George Flores, Deputy Chief of Police it Kalibo PNP nga unang nagpaeapit sa biktima sa sueod it mall ro sangka eaeaki nga nagpakilaeang seaman.
Sa andang pag-istorya hay nakumbinsi kara ro biktima nga magsunod kana paadto sa sangka saeakyan sa guwa it establisyemento kung siin may sangka babaye nga nagpakilaea kana bilang doktor ag igmanghod sigon it nasambit nga seaman.
Mag-euwas kara, may sambilog pa gid nga babaye nga nagpaeapit sa biktima.
Maabu sigon nga mga bagay kapareho it bueong ag appliances ro gintanyag sa biktima hasta nga sa makumbinsi nanda raya.
Sa sigidas nga pag-istorya, na-engganyo sigon ro ginang nga ibutang ro anang kulintas, sang pares it aritos, singsing, P1,000 ag cellphone sa bag nga ginabuytan it sambilog sa mga suspek.
Pagkatapos hay nagtrato sanda nga magkita sa sangka ospital kung siin ginpauna nanda ro biktima sakay it tricyle.
Ulihi eon sigon natueopangdan it biktima nga puro bundle it papel ro sueod it anang bag ag bukon it kwarta rason nga nagdesisyon imaw nga magreklamo sa taeatapan it pulisya kaibahan ro anang mister.
Sa pihak nga parte, padayun man nga gina-imbestigahan it mga otoridad ro natabo nga snatching ko Enero 2.
Ginpaathag ni Lieutenant Flores nga ginatinguhaan nanda nga makakita it witness sa hitabo agud nga madasig nga matumod ro pagkakilaeanhan it suspek.
