KALIBO, Aklan — Nagapadayon ro imbestigasyon it Kalibo PNP kaangot sa sunod-sunod nga panakawan sa banwa it Kalibo.
Suno kay P/Staff Sgt. Erick John De Lemos it Kalibo Police Station, may mga person of interest eon sandang ginatumod sa serye it panakawan sa banwa.
Raya suno kana hay may dati eon man nga record it pagpanakaw ag positibo nga ginaturo it mga tagreklamo.
Madumduman nga tinakawan it cellphone ro tag-iya it sangka establisyimento sa may bahin it Capitol ag ro ulihi nga nairecord hay ro mga nag kaeaduea nga mga manok nga pambueang nga nagtuga it kapyerdihan sa tagreklamo.
May kaangtanan kara, ginpadumdom ni P/Staff Sgt. De Lemos ro publiko nga maging mapagmatyag sa andang palibot partikular makaron nga panyempo nga nagahilapit ro selebrasyon it Paskwa, Bag-ong dag-on ag Ati-atihan Festival.
Posible suno kana nga magguwa eon man ro mga bentahoso nga tawo, mga myembro it budol-budol, salisi ag manakaw.
Bangud kara, inde sigon magpasilaw sa mga materyal nga bagay partikular kon ro tawo nga nagapaeapit kimu hay bukon mo it kilaea ag uwa ka kana it transaksyon.
Ginlaygayan dugang ro mga pumueoyo nga inde magsuksok it mga maeahaeon nga alahas ag inde magdaea it mga maeahaeon nga kagamitan agud nga makalikaw sa mga tikwian.
