KALIBO, Aklan—Nagpahayag sa gihapon it pagduda ro kapulisan sa bag-ong panaysayon it sangka 4Ps parent leader nga gina-alegar nga gin-abduct ag gin-hold-up ko nagtaliwan nga adlaw sa kanto it Gomburza ag Veterans St. Kalibo, kun sa siin nabo-oe kana ro kapin sa 54,000 pesos nga gin-withdraw nga kwarta it haeos 20 nana nga miyembro.
Suno kay Police Major Belshazzar Villanoche, hepe it Kalibo Municipal Police Station nga iga-review nanda ro CCTV sa portion it APSTA Center ag Milagrosa Cemetery agud nga matumod kon may kamatuoran ro anang bag-ong panaysayon sa mga otoridad.
Gindugang pa ni Villanoche nga uman nanda nga ginbalikan ro biktimang si emilyn piano matapos matukiban sa imbestigasyon nga owa it natabu nga hold-up ag abduction sa ginasugid kara nga gin-eontaran it insidente base sap ag-review sa CCTV sa nasambit nga lugar.
Bangud kara, gin-aku sigon ko ulihi ni piano nga owa it kamatuoran ro anang naunang pahayag nga samtang nagabaktas paagto sa Gomburza hay ginpasakay imaw it tricycle ag pagkatapos hay ginbo-oe it tatlong indibidwal nga nakasakay sa puti nga van nga nagasunod kanda, kun sa siin matapos nga mabo-oe ro anang kwarta hay gin-aywan imaw sa parte it brgy. libas, banga.
Nasayuran nga base sa anang bag-ong panaysayon, matapos nga maka-withdraw it kwarta sa may munisipyo it kalibo nagtikang raya paagto sa APSTA center.
Nagsakay imaw it tricycle paagto sa Milagrosa Cemetery ag nakipagkita sa anang textmate nga ginasugid nga maga-utang kunta kana it kwarta.
Nagsakay sigon imaw sa tricycle it anang textmate paagto sa libas, banga , apang samtang nga nagabiyahe hay nagpamalibad imaw nga magderetso sa baeay kara rason nga ginpapanaog imaw sa kilid it national highway kadungan ro paghabnit sa anang bag nga may sueod nga kwarta ag cash card it anang mga kaibahan nga 4Ps beneficiaries.
Bag-ong eye-ball eamang sigon sanda it anang textmate nga nakilaea eamang nana sa pangaean apang owa nasayuran ro apelyido.
Gindugang pa it opisyal nga nakikipag-angot man sanda sa banga police station sa nagapadayun nga imbestigasyon partikular sa gina-alegar nga textmate kara.
Samtang, gindugang pa ni villanoche nga pwedeng pasakaan raya it kaso it mga kaibahan nga 4Ps member engkasong mapamatud-an nga gindispalko kara ro nasambit nga kwarta.
Nagpadumdum man ro opisyal nga magdahan engkaso nga may daea nga mabahoe nga kantidad bangud nga makaron nga may pandemya hay nagakalisod ro tanan ag abu ro nakaka-isip nga magpamentaha sa andang isigkatawo.
