KALIBO, Aklan—Agud nga mabuoe ro simpatiya ag kumpiyansa it mga pumueoyo eabi eon it mga unga, nagpatigayun it sangka dayalogo ro mga katapo it Kalibo Municipal Police Station ag nagtao it candies ukon dolse sa mga pamatan-on nga kaibahan ro andang ginikanan nga naga-pamasyar sa Kalibo Pastrana Park.
Matueopangdan nga ginbawaean sa sueod it mahaba nga tyempong makagguwa ro mga pamatan-on bangud sa paeag it COVID-19 pandemic.
Tuyo it aktibidad nga maging komportable ro mga unga ag indi magkahadlok kung makakita it pulis nga nagalibot para magpatuman it health and safety protocols sa mga pampublikong lugar.
Nasayuran nga ginpasugtan eon nga makagguwa ro mga unga basta may kaibahan nga ginikanan ukon guardian sa idaeom it bag-ong advisory nga ginpagguwa ni Governor Florencio Miraflores.
Raya hay matapos nga ipaidaeom sa Alert Level 2 ro probinsya it Aklan bangud sa padayun nga pagnaba it kaso it COVID-19.
