KALIBO, Aklan–Preparado eon ro Kalibo municipal police station sa pagsikyar sa seguridad it publiko nga magatambong sa opening salvo it Kalibo Sto. Niño Ati-Atihan Festival 2023 sa Oktobre 8 sa adlaw it Sabado.
Suno kay PLt. Aubrey Ayon, deputy chief of police for operation it Kalibo PNP nga may augmentation personnel maghalin sa municipal police station it mga kaeapit nga banwa.
Mag-eowas kara, maging kabulig nanda ro Kalibo Auxillary Police ukon KAP ag Municipal Disaster Risk Reduction Management Office ukon MDRRMO personnel.
May gintaeana nga siyam nga pedestrian screening pasueod sa festival area kon siin dikaron pa eamang hay pagasikyaron ro mga indibidwal nga magasueod pinaagi sa pagtan-aw sa andang mga kagamitan nga daea.
Ginabawae suno kana ro pagdaea it bakpack, ilimnon nga sa bote, sigarilyo ag mga mataeawis nga bagay.
Samtang, bangud nga una gihapon kita sa pandemya hay ginahueat makaron it Kalibo pnp ro guidelines nga igapaguwa it IATF angud sa pagsuksok it facemask.
Nasayuran nga optional eon lang ro pagsuksok it facemask sa outdoor areas apang bangud sa ginaeauman nga pagdugok it tawo hay magiging crowded ro festival area.
Ginpasiguro man ni PLt. Ayon sa publiko nga magabantay sanda hasta sa matapos ro aktibidad para masiguro ro kaeowasan it mga merrymaker.
