KALIBO, Aklan — Posibleng igapaidaeum sa state of calamity ro banwa it Kalibo sa probinsiya it Aklan bangud sa padayun nga pagtaas it kaso it dengue.
Base sa pinaka-ulihing listahan it Provincial Health Office (PHO)-Aklan, nagsaka eon sa 1,405 ro numero it nagka-dengue sa bilog nga Aklan umpisa Enero 1 hasta Hulyo 22, 2019 samtang 15 eon ro namatay bangud kara.
Ro banwa it Kalibo ro may pinakamataas nga kaso nga nag-abot sa 355.
Bangud kara, ginrekomenda it barangay council it Kalibo sa Sangguniang Bayan nga ipaidaeum sa state of calamity ro nasambit nga banwa.
Pagagamiton ro calamity fund agud nga makabulig sa mga pasyente ag kampanya agud nga matapna ro gina-istaran it mga lamok.
Sa oras nga makaangkon it pondo, plano man it konseho nga magbakae it fogging machine.
