(Update)KALIBO, Aklan— Ginatantya nga nagaabot sa P35 milyon ro danyos it nasunog nga public market sa Kalibo, Aklan.
Suno kay Fire Marshal Senior Inspector Sedgie Gerardo it Bureau of Fire Protection (BFP)-Kalibo, kabilugang 276 stalls nga ginakaeakipan it money changer, grocery stores, restaurants, beauty salon, proccessed meat and vegetables section ag maabong iba pa ro naabo sa haeos ap-at nga oras nga pag-eamon it kaeayo bandang alas-12:15 it tungang gabi-e adlaw it Dominggo.
Nag-abot sa ikatlong alarma ro nasambitang sunog rason nga ginkinahang-ean nanda ro fire fighting units halin it BFP Balete, Libacao, Altavas, New Washington, Numancia, Malay, Ibajay, Buruanga ag Kalibo airport agud nga matapna insigida ro kaeayo.
Samtang, uwa pa sigon natumod it arson investigators kon siin orihinal nga nag-umpisa ro kaeayo nga umugdaw sa pangabuhian it mga stallholders bangud nga nagapadayon pa ro imbestigasyon.
Una kara, nagdeklara eon it state of calamity ro lokal nga gobyerno it Kalibo sa ginpatigayon nga special session it Sangguniang Bayan kon siin, unanimously ro naging desisyon it mga opisyales agud nga magamit ro 15% calamity fund para mabuligan gilayon ro mga apektadong negosyante ag vendors.
