09/15/19
Akeanon: Kalibo public market fire: LGU nagdeklara it state of calamity
(Update) KALIBO, Aklan— Nagdeklara it state of calamity ro lokal nga gobyerno it Kalibo, Aklan kasunod sa pagkasunog it public market bandang alas-12:15 it tungang gabi-e, adlaw it Dominggo.
Sa ginpatigayon nga special session it Sangguniang Bayan it Kalibo, unanimously ro naging desisyon it mga opisyales agud mabuligan gilayon ro mga apektadong negosyante matapos nga maabo ro andang ginaboe-an it pangabuhian sa sueod it ap-at nga oras nga pag-eamon it kaeayo.
Ginkasugtanan man it mga raya taw-an it temporaryong relocation site ro mga biktimang negosyante ag vendors agud maipadayon it mga raya ro panagbuhian samtang ginapatindog it uman ro pampublikong merkado.
Sa paunang imbestigasyon it Bureau of Fire Protection (BFP), ginpahayag ni Provincial Fire Marshall Superintendent Nazrudyn Cablayan nga haeos 80 porsyento it public market ro totally burn.
Kapin sa 276 stalls pa eamang sigon ro andang nailista nga ginakaeakipan it remittance center, grocery stores, restaurants, beauty salon, proccessed meat and vegetables section ag maabong iba pa.
Samtang, padayon pa nga ginausisa it awtoridad ro kabilugang sunog nga umabot sa ikatlong alarma.
