KALIBO, Aklan–Nagpatuman pa it mas hugut nga precautionary measures si Abel Policarpio, market master it Kalibo Public Market kapareho it social distancing ag sanitation procedures sa nasambit nga tindahan.
Raya hay kasunod it pagpositibo sa COVID 19 it sangka beautician.
Suno kana nga instrikto sanda makaron sa pagpasueod it mga bumaeakae agud nga masiguro ro tamang pagsuksok it face mask ag social distancing idtu.
Ginabantayan man ro pagpatuman it kaayusan sa pila it mga nagasueod ag nagaguwa sa tindahan kun sa siin nagapabilin ro andang single entry ag exit points.
Gina-maintain man sigon nanda ro andang washing area kun sa siin hay may lababo, malimpyo nga tubi ag sabon nga magamit ro mga bumaeakae sa entrance it tindahan.
Mag-eowas kara, una man ro pagbo-oe sa body temperature ag pagbutang it alcohol sa alima it mga nagasueod sa tindahan.
Bangud nga ro mga parlors ag barberya hay may direct contact sa andang mga customers, gin-abisuhan kara ro mga stall owners nga maging responsable sa pagpatuman it protocols kapareho it pagbutang it logbook sa andang entrance para sa mas madasig nga pagpatigayon it contact tracing.
Nagpatigayon eon man sigon sanda it maid-id nga disinfection sa nasambit nga section it tindahan.
