KALIBO, Aklan—Ginsuhestiyon ni Mr. Danny Lopez, presidente it vendors association sa Kalibo Public Market sa ginpatigayun nga session it Sangguniang Bayan it Kalibo nga mabakunahan ro mga vendor ag stall owners it nasambit nga merkado publiko.
Suno kay Lopez, naging positibo man ro pagbaton it mga opisyal sa anang proposisyon.
Sa kamaturon suno kana hay nagpadaea imaw it sueat kay Vice Mayor Cynthia Dela Cruz ko Agosto 9 angot kara.
Nagapati si Lopez nga importante nga maeakip sa prayoridad nga sector it pagabakunahan ro mga natungdan nga indibidwal agud nga makaangkon sanda it proteksyon kontra sa Coronavirus eabi pa ag maabo nga mga pumueoyo ro naga-adto sa tindahan.
Nagakadapat eamang sigon nga maging bakunado ro mga raya para sa kaeuwasan it parehong vendors ag pumueoyo.
Mag-eowas kara, natalakay man sa session ro disinfection ag one entry, one exit policy sa Kalibo Public Market.
Apang, hugut man ro anang pagpamaeabag kara bangud magatuga eamang sigon raya it mahaba nga pila ag pagdueotdutan it mga pumueoyo.
