KALIBO, Aklan–Gin-umpisahan it sangka konsehal ro pagpanupod it weighing scale ag blood sugar test kit sa mga kabarangayan sa banwa it Kalibo.
Suno kay Sangguniang Bayan member Matt Aaron Guzman nga 10 eon nga kilohan ag blood sugar test kit ro anang natigayon nga mapanupod.
Kada barangay suno kana sa banwa it kalibo hay pagataw-an kara sa idaeum it anang special project matapos nga mataeupangdan nga kueang sa nasambit nga kagamitan ro mga barangay health center eabi eon kon nagakilo it mga eapsag ag mga inunga para sa monitoring it timbang it mga raya.
Ginpahayag dugang it opisyal nga ro anang tuyo gid kunta nga buytan nga komitiba hay ro health, education ag sports apang uwa sigon imaw nataw-an it kahigayunan rason nga pinaagi sa anang kawang gawa hay maipadayon gihapon ro anang mga programa para sa nasambit nga sektor.
May kaangtanan kara, ginpadumdom ni Guzman ro mga nagadumaea sa health center nga taw-an it haega ag haeongan it husto ro nasambit nga mga kagamitan agud nga mabuhay pa nanda raya nga magamit.
