KALIBO, Aklan—Gin-istoryahan sa ginpatigayon nga session it Sangguniang Bayan it Kalibo ro pila ka mga tikang nga pwedeng mahimo angot sa nakataeana nga pagpatigayon it face to face classes sa mga pampubliko ag pribadong eskwelahan sa banwa it Kalibo.
May kaangtanan kara, nagbaeay it resolution si Kalibo SB member Mark Vega Quimpo kon siin ginaduso kara nga maghimo it pamaagi ro Municipal Health Office nga malikawan nga mag-inabo ro kaso it dengue partikular sa mga eskwelahan.
Suno kana, maabong eskwelahan ro nagpabutyag nga magabalik eon sa normal ro andang klase matapos nga pasugtan it Department of Education ukon DepEd nga magpatigayon it in person classes rason nga kinahang-ean nga haeongan man ro mga estudyante bukon eamang it kontra sa covid-19 kundi maging sa mga sakit nga mabueo makaron nga tinguean.
Nasayuran nga sa pinakaulihing datos nga ginpaguwa it Provincial Health Office, ro Aklan hay nakalista eon it kapin sa 37 nga kaso it dengue maghalin ko Enero 1 hasta it Mayo 7 it presenteng dag-on.
