Kalibo SB member Tolentino, ginkalipay ro dugang nga supply it bakuna para sa banwa

KALIBO, Aklan—Ginkalipay ni Sangguniang Bayan member Augusto Tolentino ro naging sabat it taeatapan ni Vaccine Czar Carlito Galvez Jr. angot sa anang apela nga mataw-an it dugang nga alakasyon it bakuna kontra COVID-19 ro banwa it Kalibo.

Setyembre 24 sigon kat nabaton nanda ro sabat it sekretaryo pinaagi sa anang ginpasa nga resolution.

Nakabaehag sigon kara ro pagpasiguro ni Galvez nga makaibahan ro lokal nga gobyerno sa mga lugar nga pagataw-an it mga bakuna nga himo it Johnson&Johnson.

Bangud kara, eauman eon sigon ro pag–abot it supply it mga bakuna sa mga maabot nga adlaw halin sa national government.

Dugang pa ni SB Tolentino nga mabahoe rayang bulig sa nagapadayun nga pakikipagsukoe it banwa sa pandemya.