KALIBO, Aklan—Magadihon it resolusyon si Kalibo Sangguniang Bayan member Augusto Tolentino nga nagahinyu sa lokal nga gobyerno nga magtaeana it pondong pangbakae it COVID-19 vaccine.
Suno kay Tolentino nga ro anang hinyu hay sangka pamaagi agud nga mataw-an it proteksyon kontra sa makamaeatay nga sakit ro mga pumueuyu sa banwa it Kalibo.
Kapin sa 30 milyon pesos ro anang ginaproponer nga pondo bilang pangdugang sa budget nga igatau it national government.
Rao nasambit nga pondo hay pwedeng utangon sigon sa banko engkaso nga owa it available fund ro munisipyo.
Dapat suno kana nga paga-unahon sa mabakunahan ro mga senior citizens, mga pigado ag ro iba pang ginakabig nga vulnerable citizens kapareho it mga persons with disabilities ukon PWDs.
Gin-engganyo man nana ro LGU-kalibo nga insigidang aksyunan ro pagbakae it bakuna agud nga indi kita maulihi.
Nasayuran nga sa makaron hay nagahueat ro iba pang LGUs sa nasyon it guidelines halin sa Department of Health ag Food and Drug Administration agud nga direktang makabakae it bakuna sa mga otorisadong manufacturer ag supplier kara sa Pilipinas.
