KALIBO, Aklan—Nagdihon it resolution si Kalibo Sangguniang Bayan member Augusto Tolentino agud nga suportahan ro ginaduso nga hagna ni Senator Chiz Escudero nga awtomatikong ma-promote ro mga empleyado it gobyerno kadungan it andang pagretiro kaparehas it mga soldado ag pulis.
Ginpaathag ni Tolentino nga sa idaeom it Senate Bill 297, ginaproponer nga ita-o sa magaretirong civil servant ro salary grade nga sangka lebel nga mas mataas sa presente kara nga posisyon sa oras it anang pagretiro.
Tuyo sigon it nasambit nga proposisyon nga mataw-an it pagkilaea ro mga nagserbe para sa banwa it mabuhay nga panyempo.
Ginataeana sa proposisyon nga ro magiging adjusted salary grade level it sangka retiree ro magiging basehan it computation para sa anang magiging retirement benefits.
Dugang pa nana nga ginamandato man kara ro Civil Service Commission (CSC), sa pakikipagbueoligan sa Department of Budget and Management (DBM) ag Government Service Insurance System (GSIS), nga magkriar it nagakadapat nga sueondanan ag regulasyon para sa epektibong pagpatuman it nasambit nga proposisyon sa oras nga maisalaye eon raya.
Sa makaron hay ginatalakay eon raya sa technical working group (TWG) it Senate Committee on Civil Service, Reorganization and Professional Regulation.
