KALIBO, Aklan—Gintalakay sa ginpatigayun nga committee hearing kahapon ro may kaangtanan sa ordinansa nga ginpasa ni Kalibo Sangguniang Bayan member Augusto Tolentino para sa mga Person with disabilities (PWDs).
Suno kay Tolentino may una gihapon nga 20 percent discount ro mga PWDs sa kada pagsakay sa mga pampublikong transportasyon, pagbakae it pagkaon, pagsueod sa mga hotel ag pagbakae it bueong sa mga botika.
Ginpabugae pa it opisyal nga nakabaehag sa anang ginpasa nga ordinansa ro pagpataas sa P4,000 pesos it mabaton nga medical assistance it mga indigent PWD engkaso nga sanda hay ma-ospital kamana man nga makabaton it P5,000 nga death benefit ro magtaliwan nga PWD.
Ro pagpatuman it nasambit nga increase hay epektibo umpisa sa masunod nga dag-on.
Kinahang-ean eamang sigon nga magbuoe it indigent certificate ro mga PWD halin sa andang presidente ukon punong barangay.
Base sa datus it lokal nga gobyerno, naga-abot sa 10,000 ro mga PWD sa banwa it Kalibo.
Madumduman nga nauna eon nga nagrequest si SB Tolentino kay Mayor Emerson Lachica nga mataw-an it sangka computer set ag printer ro kada opisina it PWD sa Kalibo para may magamit ro mga raya.
