KALIBO, Aklan—Nagpasa it sangka resolution it Kalibo Sangguniang Bayan member Augusto Tolentino nga nagahinyu nga pataasan ro ginabaton nga honorarium it mga Day Care worker sa mga kabarangayan.
Tuyo kara nga makabulig sa nasambit nga mga manugturo sa tunga it padayun nga pagsipa it presyo it mga produkto sa nasyon.
Nakabaehag sa resolution ni Tolentino nga ginahinyu kara nga ubrahon nga P2,500 halin sa presenteng P1,650 ro pagabatunon nga sweldo kada buean it mga day care worker.
Ginpaboran man it haeos tanan nga miyembro it konseho ro proposisyon ni Tolentino kung siin nagaeaum sanda nga mabaton raya it mga natungdan nga indibidwal sa mas madali nga panyempo.
Sa pihak nga parte, gintalakay dugang sa ginpatigayun nga session it Sangguniang Bayan it Kalibo ro sangka resolution ni SB member Philip Yerro Kimpo angot sa hinyu kara sa Civil Aviation of the Philippine (CAAP)-Aklan nga magbalik eon ro full force it Kalibo International Airport.
Raya hay sa tunga it amat-amat eon nga pagbalik it kapagsik it mga flight sa paeuparan matapos nga pasugtan eon it gobyerno ro pagsueod it mga dumueo-o halin sa pilng ka mga nasyon ag paghaeuga sa mga restrictions.
Nagapati ro mga miyembro it konseho nga tyempo eon para makabalik sa trabaho ro mga Airport workers nga temporaryong nawad-an it trabaho bangud sa pagpanaeasa it COVID-19 pandemic.
