KALIBO, Aklan—Gin-engganyo ni Sangguniang Bayan member Augusto Tolentino ro mga senior citizens sa banwa it Kalibo nga magpabakuna eon kontra covid 19 eabi pa ag masyadong makataeapon ag peligroso ro bag-ong variant nga Omicron.
Raya hay kasunod it napabalita nga pila sa mga senior citizens hay owa nagsipot para sa andang 2nd dose samtang ro iba hay padayun nga nagapamalibad nga magpabakuna bangud sa nagkaeain-eain nga mga rason.
Kalitan suno kay Tolentino nga manami nga inisyatibo ro ginpatigayon it ibang banwa nga nagpatigayon it mga pa-raffle agud nga maengganyo ro andang mga pumueuyu eon ro mga senior citizens nga magpabakuna.
Igasuhestiyon sigon nana raya kay Kalibo Mayor Emerson Lachica.
Sa pihak nga parte, ginpaabot pa it opisyal nga nagdihon imaw it sangka resolusyon nga magatau it dugang nga medical ag burial assistance sa parehong seniors citizens ag persons with disabilities ukon PWDs bangud sa nagakaigo nga pondo para kara.
Kon dati suno kana hay 2,500 ro medical assistance paga obrahon raya nga 4,000 samtang ro burial assistance halin sa 3,000 pesos hay magiging 5,000 pesos eon.
Magiging epektibo sigon ro dugang nga assistance sa 2022.
