Haom eon si Kalibo SB member William Lachica Jr. nga magpanerbisyo sa mga kalibonhon kon siin ginpasiguro nana ro all-out nga suporta kay mayor Juris Sucro.
Pagapanindugan nana ro commitment nga bukon eamang it limitado sa barangay Andagao ro anang pagpanerbisyo kon siin imaw naghalin bilang punong barangay kundi maging sa bilog nga banwa it Kalibo.
Preparado imaw sa tanan nga hangkat ag willing nga magkaantiguhan sa tanan nga bagay bilang unang termino sa pagka konsehal it banwa.
Sa edad nga 41-anyos hay may kaugalingon nga negosyo kon siin raya man ro rason kon ham-an it ginbutang imaw bilang chairman sa Committee on Business, Trade and Industry.
Aminado imaw nga bukon it madali ro komitiba nga anang pagadumaeahan apang may kasayuran sigon imaw pag-abot sa negosyo rason nga ginkalipay man nana ro anang naging posisyon ag ro responsibilidad nga nakataeana para kana.
