Mabahoe ro pagpasaeamat it Kalibo shopping center vendors association kay mayor Juris Sucro matapos nga gintaw-an sanda it gwardya nga mismong ro lokal nga gobyerno ro magapsweldo.
Bangud kara, ro andang natipon nga nagaabot sa P140, 465 pesos bilang pondo nga inugpasweldo kunta sa andang gwardya hay ginbakae eon lang nanda it cctv cameras nga presenteng naka-install sa sueod ag guwa it shopping center nga kapin sa daywang dominggo eon nga nagagana.
Suno kay Engr. Jun Beltran, presidente it nasambit nga asosasyon, ro kada stall holder sigon hay nagata-o it P200 pesos kada buean sa asosasyon bilang pondo nga pasweldo sa andang gwardya 15/30 nga swelduhan.// apang, ko buean it Agosto hay nakabaton imaw it abiso halin sa security agency nga matapos ro andang kontrata hasta it Agosto 31.
Rason nga ko Agosto 15 hay nagsueat imaw sa alkalde agud nga magpangayo it daywang bilog nga gwardya apang sa uwa ginaeauman hay tatlo gid ro gintao kanda ni mayor Sucro nga ginakaeakipan it daywang ka watchman ag sangka blue guard.
Angot kara, nabuhinan sigon ro andang gaeastusan kon siin allowance eamang ro andang igata-o nga sang libo kada tawo ag 150 pesos nga balor it load sa sueod it sang buean.
Raya suno kana ro ginhalinan kon ham-an it nakapatakod sanda it cctv cameras nga ginkasugtanan it asosasyon bangud sa mabahoe nga bulig sa mga negosyante nga maprotektahan ro andang mga baligya ag iba pang kagamitan sa sueod it shopping center.
