KALIBO, Aklan–Owa nagakahawag ro Kalibo shopping center vendors association nga makaeapos kanda ro peke nga kwarta nga eapnaag sa tyempo it holiday season.
Ginpaathag it presidente it asosasyon nga si Engr. Jun Beltran, bukon man sigon it masako ro shopping center mag-eowas eon lang sa mga botika ag sa iba pang stall nga essential ro baligya.
Raya hay matapos nga may mga cctv cameras nga nakapalibot sa shopping center.
Mag-eowas kara, may watchman sigon nga nagabantay rason nga kampante sanda nga inde mabiktima it peke nga kwarta.
Apang, kon salisi suno kana ro pagahambaean hay inde gid raya malikawan bangud nga ko nagtaliwan nga buean hay sangka miyembro nana ro nagreport nga nasalisihan sa comfort room matapos nga ro naaywanan nga original nga gunting hay naduea sa makadaling oras nga nalipatan nana raya.
Angot kara, panugyan nana sa anang mga miyembro nga maging alerto ag mapagmatyag eabi eon sa mga customer nga may kamaea-maeahan nga hueag.
Madumduman nga sangka baealigyaan it milktea ro sangkiri eon lang nabiktima it peke nga kwarta.
Apang, napas-eawan ro babayeng suspek matapos nga nakit-an ro cctv camera sa sueod it baealigyaan rason nga nagkaripas raya it guwa ag gin-aywanan ro gin-order nga milk tea.
