KALIBO, Aklan—Nagdihon si Kalibo vice mayor Cynthia dela Cruz it sangka resolusyon agud nga hinyu-on ro gobyerno probinsiyal it Aklan nga magbulig sa pagtukod ag magadumaea nga espesyalista sa treatment facility para sa mga alcoholics.
Suno kana nga tuyo it anang resolusyon nga naun eon nga gin-aprubahan sa ginpatigayon nga session ko Lunes nga adlaw nga mapugngan ag makontrol ro pagka-adik sa alcohol it pilang mga indibidwal sa banwa it Kalibo.
Dapat suno kana nga mataw-an it nagakaigo nga bulig ro mga alcoholics nga gusto eon nga magbag-o, apang owa makasayod kon sa anong pamaagi raya paga-umpisahan.
Dugang pa nga masyadong magastos ro pagbueong agud nga makalikaw sa pagkasugapa sa aeak.
May pila man sigon nga mga indibidwal nga owa nakasayod nga adik eon sanda sa aeak.
Ginpahayag pa it bise alkalde nga nakaangkon eon sanda it pag-istorya angot kara ni Aklan governor Joen Miraflores ag nagpahayag imaw it kahauman nga magabulig sa nasambit nga proyekto.
Kaibahan suno kana ro aeak sa mga bisyo nga mabudlay nga mapugngan kon makasanayan it sangka tawo eabi pa kon sa batang edad hasta sa paggueang hay nakahiligan raya ag naging bisyo eon ro pirmeng pagpahilong.
Bilang sangka doktor, nagakabaeaka sigon imaw sa makarondaya nga problema bangud nga may maeain nga epekto ro aeak sa ikamayad nga eawas.
Nasayuran nga may pilang tawo ro nagatinguha nga maka-usoy it solusyon agud nga magpundo ukon makontrol ro andang bisyo nga suportado it andang pamilya.
Target nanda nga ibutang ro proyekto sa Substance Abuse Facility sa Barangay Nalook, Kalibo nga nakataeana para sa mga drug addict.
Ro eubus sigon nanda nga kinahangean hay ro espesyalista nga magadumaea sa pasilidad.
