KALIBO, Aklan — Uman nga gingamit it owa nakilaea nga indibidwal ro pangaean ni Kalibo Vice Mayor Philip Kimpo para maka-order it pagkaon, gabi-i it Martes, Abril 20, 2026.
Ro modus hay kapareho man ko nagtaliwan nga dag-on kun sa siin nag-order sa sangka pizza house ro suspek gamit ro pangaean it opisyal ag ginapa-deliver sa sangka hotel .
Suno sa 33 anyos nga eaeaki nga store manager it sangka pizza house sa banwa it Kalibo nga may sangka tawo nga nagtawag kanda ag nagpakilaeang si “Vice Mayor Kimpo.”
Nag-order sigon ro caller it pilang box it pizza ag softdrink nga nagabalor it kapin sa P7,000 ag ginapa-deliver sa sangka condotel.
Dugang pa nga nagpabakae pa raya it bueong sa sangka drug store.
Bangud sa pagduda it manager, ginpa-double check ro caller ag matapos nga mapamatud-an nga scam hay nagdangop sa kapulisan agud nga magpasaka it reklamo .
Madumduman nga ko nagtaliwan nga dag-on hay personal nga nagdangop sa Kalibo Municipal Police Station si Vice Mayor Kimpo kaibahan ro sangka delivery rider it sangka pizza store sa Kalibo agud nga ireklamo ro suspek nga naggamit sa anang pangaean agud nga lokohon ro rider.
Nag-order ro caller it limang kahon it pizza ag gindeliver sa sangka hotel sa Barangay Old Buswang.
Samtang paagto eon ro rider agud nga ihatud ro order, uman nga nagtawag ro suspek ag ginhinyu nga bayaran anay it rider ro pizza pinaagi sa online transfer.
Nagpromisa ro suspek nga pagabayaran raya pag-abot sa hotel. Apang pag-abot it rider sa hotel, ginpahayag it sangka staff nga owa idtu ro bise alkalde.
Nauna eon nga ginpromisa it bise alkalde sa anang social media page nga indi imaw magapundo hasta nga indi mausoy ro suspek.
