KALIBO, Aklan—Ginpakigbahin it mga nurses sa nagkaeain eain nga parte it Western Visayas ro andang mga kalisod nga naagyan bilang una sa frontline agud nga suk-ean ro pandemya nga naga-eapta sa nasyon tuga it Coronavirus Disease 2019 ukon COVID-19 bilang pagselebrar makarun it International Nurses Day.
Suno kay Robby Bastareche, registered nurse it Department of Health ukon (DOH) Western Visayas nga sambilog eamang sa anang ginakahadlokan hay ro tyansa nga base imaw msmo ro magdaea it virus sa anang gina-ulian nga pamilya.
Medyo risgo man sigon sa anang parte nga bukon imaw it sigurado kung may covid baea ukon owa rason nga ginatiis eun lang ro mahabang tyempo nga indi makaibahan ro anang bilog nga pamilya mas kapin ag puro senior citizen ro anang ina ag ama.
Samtang, ginakabig man nga struggle ni Suzanne Zaspa ag sangka Public Health Nurse it Rural Health Unit (RHU) Libacao ro andang nauna nga na-eksperyensiyahan pag-abot sa pakikipagsukoe sa covd-19 pandemic.
Suno kana nga naging malisod para kanda ro dating sitwasyon kung sa siin nagapaiba-iba ro mga ginapatuman nga protocol.
Mabahoe man nga challenge para kanda nga sa anda mismong banwa maghalin ro pinakaunang nailistang kaso it covid-19 sa probinsya it Aklan.
