Kanugon ro kapin sa 27 milyon doses it bakuna nga maga-expired eon sa Hunyo ag Hulyo.
Sangkaterba eon gali ro bakuna sa nasyon suno kay Presidential Adviser for Entrepreneurship Secretary Joey Concepcion.
Naga-abot sa kabilugan nga 80 milyon doses it bakuna ro iya makaron sa nasyon ag ro 27 milyon kara hay ma-expired eon sa maabot nga mga binuean.
Maabu san aka-stock hay para sa booster shots bangud nga sangkiri ro nagapaturok kara.
Naging kampante eon ro kaabuan bangud nga nakita nanda nga nagnaba eon ro kaso it COVID , apang bangud sa manaba nga numero it nagapa-boooster, ginaeauman nga basi umalagwa eon man raya.
Kabay nga maengganyo ro kaabuan naton nga mga kababayan nga magpa-booster eon bangud nga naganaba eon ro immunity sa bakuna sa pagtaliwan it mga binuean.
Rason nga importante ro booster agud nga may una nga proteksyon ag pangsukoe.
Todo ro padumdum it gobyerno nga kalitan it kaabuan ro naka-stock nga bakuna eabi pa ag nagapangatubang ro nasyon sa mabahoe nga paeag it pagtaeapnan bangud sa nagahilapit nga eleksyon.
Sa forecast, ginatos ka libu ro posibleng uman nga maging bag-ong kaso it COVID pagkatapos it May 9 elections.
Indi maging pasaway.
Sundon ro mga ginapatuman nga patakaran agud nga indi matuead sa natabu sa ibang nasyon partikular sa China nga maabu eon man ro namatay bangud sa nagkaeain-eain nga variant it COVID.
Indi eon paghueaton nga magtaas pa ro kaso antes nga magdagsa sa mga vaccination sites agud nga magpa-booster shot, kun sa siin kapos eon ro mga bakuna bangud nga gindonar eon it Pilipinas sa ibang nasyon nga nagakinahangean.
