Ginsiguro ni Speaker Martine Romualdez ro transparency sa ginaduso nga hagna nga Maharlika Investment Fund nga sambilog sa mga key safeguards nga gin-eakot it Kamara para masiguro ro proper utilization it nasambit nga pondo ag malikawan ro saea nga paggamit sa sovereign wealth fund.
Ko nagtaliwan nga Huwebes gin-aprubahan eon it Kamara sa third and final reading ro House Bill (HB) No. 6608 nga tuyong magtukod it MIF kung siin nakaboue raya it overwhelming votes maghalin sa mga lawmakers, matapos nga sertipikahang urgent ni Pangueong Bongbong Marcos.
Ginpunto ni Speaker Romualdez nga sa idaeom it approved House Bill 6608, nakapasueod sa sangka probisyon nga ro publiko hay puweding gamition ro andang right to freedom of information angot sa MIF financial matters.
Ro nasambit nga hagna hay ginsuhesiyon ni ACT Teachers Party-list Rep. France Castro.
Sa kampo man ni Albay 2nd District Rep. Joey Salceda, chairman it technical working group (TWG) sa HB 6608, nga ro nasambit nga safeguard hay nakapasueod sa Section 29 it nasambit nga hagna apang ginpili sa gihapon raya nga batunon ro amendment it teacher solon.
Tuyo it HB 6608 hay para sa pagtukod it MIF para iduso ro pag-umwad it ekonomiya sa pamaagi it paghimo it mga estratehiko ag nagakita nga kapital sa mga nagapanguna nga sektor.
Sa pihak nga parte, gintaeana man kara ro indi magnaba sa 25 porsiyento nga kita it MIC para sa mga programang panlipunang kapakanan.
