Ginpasiguro ni House Speaker Martin Romualdez nga magadoble kayod pa ro House of Representatives sa masunod nga dag-on eabi eon gid ag nag-umpisa it arangkada ag magnami ro ekonomiya it nasyon.
Welcome man para kay Speaker Romualdez ro naging pahayag ni Finance Secretary Benjamin Diokno nga maga-umwad pa ro ekonomiya it nasyon sa masunod nga dag-on.
Suno kay Romualdez, magserbi rayang inspirasyon para mas pang magpursige ro House of Representatives nga magpasa it mga hagna nga magabulig para mapabilin ro manami nga daeagan it ekonomiya ag mapamayad ro pagpangabuhi it mga Pilipino.
Sandig sa sangka statement ginpahayag ni Diokno, nga sa pihak it global recession projection it pilang eksperto sa 2023, ro 6.5 average gross domestic product (GDP) outlook para sa Pilipinas hay nagapabilin nga sambilog sa pinakamataas nga growth rates sa ASEAN.
Suno sa sekretaryo, mabahoe nga bulig man ro mga gintukod nga hagna it Kongreso kapareho it Medium-Term Fiscal Framework (MTFF) makaron nga 19th Congress, ag ro amyenda sa Retail Trade Liberalization Act, Foreign Investments Act, ag Public Services Act.
Ginpasiguro man ni Romualdez, nga gilayonm nga paga-aksiyunan it Kamara ro nabilin nga 12 LEDAC priority measures pagbalik it sesyon it Kongreso sa Enero 2023.
Samtang, positibo ro panan-awan it Department of Finance (DOF) nga maka-angkon it mas mapagsik nga ekonomiya ro nasyon.
Nagapati man si Diokno nga mabahoe nga bullig ro pagtukod it sovereign wealth fund para mapondohan ro mga importanteng proyekto.
