KALIBO, Aklan—Ginpasiguro ni Fiscal Flosemer Chris Gonzales it Aklan Prosecutor nga ro kampanya kontra sa illegal nga droga hay magatayuyon ag inde nanda pag-untatan ro nagapadayon sa pagduso it illegal nga droga.
Ro pahayag ni Atty. Gonzales hay kasunod it project launching and blessing it Kalibo various livelihood nga pagadumaeahan it Person Who Used Drugs ukon PWUDs nga nagpaidaeom sa Community Based Rehabilitation Program (CBRP) it lokal nga gobyerno ag pulisya.
Suno kana, ro 30 benepisyaryo it nasambitang proyekto ro magiging ehemplo sa iba nga posible pang magbag-o ro tawo maskin nga nakahimo raya it saea.
Samtang, gin-engganyo man ni Police Lieutenant Colonel Richard Mepania, hepe it Kalibo Police Station ro mga PWUDs nga nag-graduate eon sa CBRP nga padayunon ro andang naumpisahan nga pagbag-o.
Suno kana, kon man-uno kaabo ro nagsueod sa CBRP hay dato man kaabo ro nabawas sa andang problema ag sakit sa ueo.
Sa pihak nga parte, suno kay Aklan Baghay President Ramel Buncalan, magiging hangkat sa mga PWUDs kon paano dumaeahan it maayos ro andang negosyo.
Bangud kara, ginpromisa ni Buncalan nga pagahimuon nanda ro tanan agud nga ma-sustain ro livelihood it mga benepisyaryo agud nga magiging tayuyon man ro andang pagbag-o.
