KALIBO, Aklan — Bangud sa mga insidente it krimen nga gina eakitan it riding-in-tandem, nakataeanang ilunsar it Aklan Police Provincial Office ro “Oplan Clean Rider” sa bug-os nga probinsiya it Aklan.
Suno kay SPO1 Nida Gregas, tagapaghambae it APPO, tinotuyo kara nga mas pang mapabaskog ro operasyon it kapulisan kontra sa Motorcycle-Riding Suspects (MRS).
Sa record it APPO, maghalin ku Enero 2017 hasta sa makaron, naga abot eon sa pito ro mga insidente it krimen nga gina eakutan it riding in tandem sa probinsiya, kun siin ro pnakaulihi hay natabo kahapon it agahon matapos mapatay ro negosyanteng si Aurello Padasas, 53-anyos sa bahin it Sitio Bueak, Brgy. Camanci, Batan, Aklan.
Target it programa ro mga kolorum, bukon it rehistrado ag gin takaw nga motorsiklo nga masaming ginagamit it mga suspek.
Nagpanawagan raya sa mga rider nga magpadueong sa andang mga police station ag sa oras nga ma-chekyar nga malimpiyo ro mga dokumento, paga butangan it sticker ro anang motorsiklo nga maga pamatuod nga imaw hay sangka “clean rider”, kun siin, magiging hassle free man sa mga checkpoints.
Gin pahayag pa ni Gregas nga sa maabot nga Hulyo 27, dueonghan nga iga lunsar ro programa sa 17 nga banwa sa Aklan kaibahan ro mga alkalde ag magkaeain-eain nga grupo it mga rider.
