Gina tan-aw it kampo ni Vice President Leni Robredo ro mga nag-eontad nga mga aberya sa ginpatigayon nga National and Local election 2022.
Ginpromisa ni VP Leni nga insigida nga igapasayod it andang kampo sa publiko ro mangin resulta it andang diskurso kaibahan ro mga eksperto may kaangtanan sa mga alegasyon nga padayon nga naga-guwa sa social media.
Ginpahayag it bise-presidente sa ginpatigayon nga misa pasasaeamat nga gin-organisa it Solid Leni Bikol sa pungsod it Naga nga ginarespeto nana ro mga naboue nga boto ni Marcos apang indi sigon puwedi nga pagalipatan ro ibang boto raya hay kasunod sa mga nagka-aberya nga mga vote counting machine ukon VCM.
Suno pa kay VP Leni nga basi may mga boto nga owa pa hapatigayon nga mahuyap ag mga huna-huna sa eleksyon nga kinahangean nga mataw-an it nagakaigo nga sabat.
Samtang, bukon sigon it dikara magatapos ro anang plataporma para sa isaeang ka maayos ag malimpyo nga gobyerno apisar nga owa imaw nangin madinaeag-on bilang Presidente it Pilipinas.
Pagapadayunon sa gihapon nana ro mga naumpisahan nga programa kaibahan ro mga tawong may kaparehas sa anang adbokasiya.
Sa pihak nga parte, gin-engganyo man ni Robredo ro tanan nanang tagasuporta nga batunon ro ano man nga maging pinal nga resulta it eleksyon sa pihak it nagakaeain-eain nga ginapangatubang nga emosyon.
