Gintawag it kampo ni Vice President Sara Duterte nga “malicious fabrications” ag “black propaganda” ro mga bag-ong alegasyon ni dating senador Antonio Trillanes IV angot sa gina-alegar nga pondong naghalin sa China nga konektado sa pilang organisasyon ag kompanyang may kaangtanan sa pamilya Duterte.
Suno kay Atty. Paolo Panelo Jr., tagapaghambae ni Duterte, indi sigon masarangan nga panindugan ni Trillanes sa legal nga proseso ro anang mga pahayag matapos kara nga owa nagtestigo sa impeachment court.
Ginpamilit ni Panelo nga dapat kunta hay nagpaidaeum sa cross-examination si Trillanes agud nga mausisa ro anang mga alegasyon kontra sa mga dokumento ag ebidensya.
Samtang, ginpahayag ni Trillanes nga ₱319 milyon halin sa Chinese government ag China-based corporations ro naagto sigon sa CALLE 88 Foods Corp., nga gina-angot sa asawa it bise presidente nga si Manases Carpio.
Ginpahayag pa nana nga nakabaton sigon it ₱150 milyong donasyon halin sa Chinese Embassy ro sangka foundation kun sa siin incorporator si Duterte. Ro mga nasambit nga pahayag hay mga alegasyon ni Trillanes ag kinahangean pang mapamatud-an sa nagakaigo nga proseso.
