KALIBO, Aklan — Nagapadayun pa ro imbestigasyon it pulisya sa gina-alegar nga pagbunae it bote sa ueo it sangka kandidato sa pagka-provincial board member sa ikaywang distrito it probinsiya it Aklan it Municipal Legal Officer it lokal nga gobyerno it Malay.
Suno sa Malay Municipal Police Station, ginreklamo ni Mr. Jonathan Cabrera, 41, residente it Brgy. Manocmanoc sa isla it Boracay si Atty. Melanio Prado, Jr. residente it Brgy. Balusbos, Malay.
Nag-ugat sigon ro insidente kat ginpakilaea si Cabrera it anang amigong si Jose Oczon kay Atty. Prado samtang sa sueod it sangka restaurant.
Samtang ginadawat sigon ni Cabrera ro anang alima agud nga makipaglamano sa abugado hay gulpi kara nga ginbo-oe ro bote sa ibabaw it lamesa ag ginbunae sa anang ueo.
Mag-eowas sa gin-angkon nga mabahoe nga bukoe sa ueo it biktima, ro insidente hay nagtuga man it eskandalo sa sueod it establisimento.
Samtang, ginatinguhaan it Bombo Radyo Kalibo nga mabo-oe ro parte ni Atty. Prado sa nasambit nga isyu.
