KALIBO, Aklan — Makasigurado eon it kadaeag-an ro sangka nagapa-ilihir nga alkalde sa sangka banwa sa Aklan matapos ideklarang nuisance candidate it Commission on Elections (Comelec) ro anang solomenteng maka-engkwentru sa maabot nga eleksyon sa Lunes, Mayo 13.
Napamatud-an nga si Ludovico Villaruel Jr., 68-anyos, sangka independent candidate hay owa it ikasarang nga magpadaeagan nga mayor sa banwa it Balete, mag-eowas pa nga ginakuwestiyon ro anang residency bagay nga ginmanduan nga boe-on sa listahan it mga kandidato.
Ro resolution angot sa diskwalipikasyon ni Villaruel hay base sa gindihon nga reklamo ni incumbent mayor Dexter Calizo nga ginpaguwa ni Second Division Acting Clerk Abigail Justine Cuaresma Lilagan nga may petsang Mayo 9, 2019.
Nadiskubre sigon it election officer it nasambit nga banwa nga owa it baeay si Villaruel sa anang gintau nga address.
Mag-eowas kara, owa man imaw it political organization ukon supporters agud nga magbulig sa anang kandidatura.
Suno sa Comelec, pagakabigon sigon nga stray votes ro anumang boto nga mabo-oe ni Villaruel.
