KALIBO, Aklan—Paealigban sa sangka pamilya ro matsa pag-gus-ab sa andang alagang kanding sa Brgy. Laguinbanua, Ibajay.
Sa interview it Bombo Radyo, ginpahayag ni Jeraldin Sibua nga nadiskubrehan nanda ro pag-atake it indi pa matumod nga sapat sa andang kanding, bandang alas-2 it hapon it Lunes, Setyembre 2 sa nasambit nga lugar.
Suno kana nga nakataeana eon kunta nga pagahalinon it anang mister ro sapat, apang nakibot kat makita ro kahimtangan it andang alaga.
Nakit-an ro kanding nga nagapang-edaron it daywang dag-on nga owa eon ro pihak nga parte it anang eawas partikular sa tiyan nga portion .
Nagkaealhit man ro nabilin nga mga kasudlan ag dugo sa nasambit nga lugar.
Ginpahayag ni Sibua nga raya ro kauna-unahan nga kahigayunan nga naka-eksperyensya sanda it makarondayang hitabu sa sueod it pilang dag-on nanda nga pag-alaga it kanding.
Mabahoe ro andang pagpati nga mga asong gala ro umatake bangud nga natabu man raya sa andang lugar ko nagtaliwan nga mga dinag-on.
Agud nga mapuslan hay ginkarne nanda ro ibang parte it anang eawas.
Dugang pa nga kon ayam sigon ro umatake hay posibleng bukon eamang it sambilog kundi maabu nga iba pa.
Laygay nana sa mga may alagang sapat nga indi pag-ihab-on sa maeayo nga lugar ag pirmeng bisitahon.
Sa pihak nga parte, pahayag ni barangay kagawad Jessa Joy Salvador it nasambit nga lugar nga paga-imbestigahan nanda ro natabu eabi eon ro pagtumod kon anong klase it sapat ro nag-eapa sa kanding.
Laygay pa nana sa anang mga pumueuyu nga maging mapagbantay eabi eon ro mga may alagang kasapatan.
Maskin nga maka-alarma apang naga-apela ro opisyal nga likawan ro mga espekulasyon nga maeain it ginhawa ukon aswang ro umatake.
