KALIBO, Aklan–Ginkumpirma it Kalibo Auxillary Police nga uwa sanda nagakumpiska it driver’s license it mga motoristang makit-an nga may bayolasyon sa batas trapiko.
Suno kay Arnie Briones, team leader it KAP members nga ginahinyo nanda sa mga violators ro andang lisensya agud nga maboe-an it data nga igasueat sa citation ticket.
Pagkatapos kara hay anda nga papirmahon ro driver antes nga ibalik ro lisensya.
Ro gina-imponeran eamang nanda it citation ticket hay ro mga nagaeabag sa municipal ordinance nga hugot nga ginaimplementar sa banwa it Kalibo.
Una kara, nagpaguwa it memorandum ro Department of the Interior and Local Government ukon DILG kon siin ginapadudom nga ro Land Transportation Office ukon LTO ag ro deputized agents eamang kara ro may mandato it laye nga magkumpiska it mga lisensya it mga motoristang nagaeabag.
Nagapati ro ahensya nga nakabase raya sa naunang desisyon it Korte Suprema ag sa mga probisyong nakabaehag sa idaeom it Republic Act 10930 nga ro pagkumpiska it driver’s license hay pwede eamang nga himuon it LTO.
