KALIBO, Aklan—Ginplastar it sambilog sa mga miyembro it Kalibo Auxiliary Police (KAP) ro pilang ka mga polisiya nga andang ginapatuman angot sa pag-isyu it ticket sa mga motorista ag driver it pampublikong saeakyan.
Raya hay kasunod it pagticket ni Mr. Te Tebobos it Kalibo Auxiliary Police sa tricycle driver nga si King Nacar nga may biyaheng Numancia-Kalibo vice versa ko Enero 26.
Nasayuran nga matapos isyuhan it citation ticket nga nagabalor it P1,500 bangud sa “illegal terminal” si Nacar hay nagreklamo raya.
Ginpaathag ni Tebobos nga nakabaehag sa ordinansa nga indi pwedeng magpick-up it mga pasahero ro mga tricycle driver it Numancia bangud makabig raya nga iligal kun owa naghalin sa terminal.
Nakasugtanan man sigon nga magahatod eang sanda it pasahero sa paradahan ag hugut nga ginabawaean ro pagpick-up rason nga klarong pag-eabag ro ginhimo it nasambit nga driver.
Sa pihak nga parte, nakataeana nga mag-atubang sa Lunes ro magtimbang nga parte matapos nga magpa-blotter si Tebobos kasunod it nag-eapta nga istorya nga pagabakueon imaw ni Nacar sa oras nga magsueod raya sa tindahan it Numancia.
