KALIBO, Aklan—Haum nga magpasaka it nagakaigo nga kaso ro sangka miyembro it Kalibo Auxiliary Police ukon KAP kontra sa owa pa nakilaea nga driver it sangka Sports Utility Vehicle ukon SUV matapos nga masaewig imaw it anang saeakyan ag tinamaan it side mirror bandang alas-3:35 kahapon it hapon sa kahabaon it Roxas Avenue, Kalibo.
Suno sa biktimang si Kenneth Dester Daria, 43-anyos nga nabutang sigon sa peligro ro anang kabuhi bangud sa nasambit nga insidente.
Ginpahayag nga ginsita nanda ro driver it kulay itom nga Montero nga may plakang AAK-6439 matapos raya nga mag-u-turn sa one-way sa nasambit nga lugar.
Posible sigon nga nairita ro driver sa andang pagsita kamana man nga posibleng may ginatago rason nga owa raya nagpundo ag ginpaharurot pa ro anang saeakyan, kun sa siin nasaeawig imaw ag lumigid it tatlong beses.
Ginpahayag dugang nga nagpaeagas pa ro suspek hasta sa barangay bulwang numancia ag natigayon nanda nga ma-corner, apang uman nga nakapaeagiw hasta nga nabungguan kara ro sangka naka-park nga motorsiklo.
Gina engganyo man it KAP member ro sin-o man nga may impormasyon nga makabulig sa pagtumod sa pagkatawo it driver nga makipag-angot kanda ukon sa pinakamaeapit nga estasyon it pulisya.
Sa pag-review it mga awtoridad sa CCTV sa lugar hay nasayuran ro plate number it saeaktyan.
