KALIBO, Aklan–Pabor si Punong Barangay Nixon Sualog it Manocmanoc, Boracay sa ginaduso nga West Aklan Special Economic Zone Act ukon WASEZA.
Suno kana nga ro gina-proponer ni house committee on economic affairs vice chairman ag Aklan 2nd district Rep. Ted Haresco Jr., nga WASEZA hay makatau it dugang nga investment partikular it mga dumueuong ag trabaho sa rehiyon kamana man nga maka-amot sa pagbangon it ekonomiya it nasyon ag development.
Tuyo pa sigon kara nga mapa-umwad ro western side it probinsiya agud nga ro mga investors hay indi eamang maga-focus sa isla it boracay bangud nga fully-developed eon raya.
Nagapati man si sualog nga ro WASEZA hay bukon it bag-ong version it kontrobersiyal nga Boracay island development authority ukon BIDA bill nga nauna eon nga ginpamalibaran it mga Akeanon.
Sa idaeum sigon it WASEZA, mag-eowas nga maganaba ro pagabayaran nga buwis bangud sa pagiging economic zone kara hay magapabilin ro local autonomy ukon gahum it mga opisyal it lokal nga gobyerno ag mga barangay.
Ro disbentaha eamang sigon sa ginaduso nga hagna engkaso nga maging laye hay makaangkon it chairman ro WASEZA nga sa makaron hay paealigban kanda kon sin-o ro posibleng magapungko.
Sa pihak nga parte, ginpasiguro sigon kanda ni malay mayor frolibar bautista nga paga-estudyuhan pa it sangguniang bayan ro nasambit nga proposed bill bangud nga pagakinahangeanon ro andang endorsement kaibahan ro mga barangay sa pag-apruba kara.
Importante man sigon nga mabo-oe anay kara ro pulso it publiko.
Mag-eowas sa WASEZA, waeo pang probinsiya ro naga apply sa kongreso nga makaangkon it special economic zones
