Bukon it pabor ro Kalibo Pederation Tricycle Operators and Drivers Association (KAPETODA) sa proposisyong mag-pasueod it electric vehicle sa banwa it Kalibo.
Suno kay Antonio Nama, presidente it nasambit nga grupo, ginkonsulta nana raya matapos nga mataeupangdan sa social media ro plano nga pagpatuman kara kun sa siin uwa naga-pabor ro anang mga ka grupo bangud nga imbes sigon nga uwa sanda it utang hay magka-utang pa.
Dugang pa kara nga sa makaron hay mahina ro byahe ag uwa pa it masyadong kita ro mga drivers.
Paathag pa ni Nama, matsa nag-usoy eon lang dayon sigon it bato nga inugpukpok sa andang ueo kun magabuoe sanda it hueugan nga e-trike.
Tanan man sigon nga presidente it TODA hay indi mag-sugot kara bangud nga nagakuliit eon sa boundary ag gasolina ro mga drivers.
Dugang pa ni Nama, nga indi dapat ituead sa isla it Boracay ro banwa it Kalibo bangud nga sentro mat-a raya it turismo kumpara sa Kalibo nga haeos tig-sambilog eon lang ro masakay nga pasahero.
Mahugot nana nga ginapamaeabagan ro nasambit nga proposisyon bangud mas kapin eon lang nga malisdan ro mga drivers sa pagpangita.
Dapat eon lang sigon nga istudyuhan ro mga colorum nga naga-byahe nga nagiging kaagaw pa it mga drivers ag operators sa pasahero.
