KALIBO, Aklan—Nakalista it haeos masobra sa 10,000 hasta it 13,000 nga mga turista ro nagbisita sa Isla it Boracay kahapon nga Huwebes Santo ukon Maundy Thursday.
Suno kay Senior Chief Petty Officer Dominador C. Salvino, Deputy Station Commander for Operations it Philippine Coast Guard Aklan nga sa pinakaunang kahigayunan umpisa nga nag-eupok ro pandemya hay gindagsa it mga turista ro isla.
Sa kamatuoran sigon kara hay umpisa it agahon hasta it hapon hay owa it ungkat ro pag aeabutan it mga turista sakay sa mga barko ag eroplano paadto it Boracay.
Sa pihak kara, ginpasiguro man it PCG Aklan nga hugot ro andang pagbantay agud nga masiguro sa gihapon nga ginasunod it publiko ro ginapatuman nga health protocol.
Bantay sarado man sigon nanda ro mga saeakyang pandagat agud nga indi ro mga raya makapamintaha sa andang mga pasahero.
Samtang, nagpadaea man sanda it dugang nga tawuhan sa mga port ag nagdugang pa it augmentation maghalin sa pilang ka mga kaeapit nga istasyon.
Sa makarun nga Biyernes Santo hay ginaeauman man nga maganaba eun ro numero it mga pasahero bangud kanselado ro biyahe it mga barko maghalin sa Batangas ag Romblon paadto sa Caticlan ag vice versa.
