KALIBO, Aklan—Nakalista it kapin sa 110 nga pinakamataas nga kaso it covid-19 sa sueod it sang adlaw sa bilog nga probinsya it Aklan.
Sa datos nga ginpaguwa it Aklan Provincial Epidemiology Surveillance Unit it Provincial Health Office, raya hay ginakaeakipan it 24 maghalin sa banwa it Kalibo; 22 sa Nabas; 21 sa Tangalan; 17 sa Makato; 12 sa New Washington; 7 sa Numancia; daywa sa Lezo ag tig-sambilog maghalin sa banwa it Malinao; Balete; Banga; Batan ag Ibajay.
Bangud kara, humampak pa sa kabilugang 3,594 ro kabilugang kaso it deadly virus sa probinsya.
Sa pihak kara, nadugangan man it 37 ro mga nagmayad matapos nga nagpaidaeom sa pagbueong rason nga nagaabot eon man sa kabilugang 2,556 ro total recoveries it sakit sa Aklan.
Sa makaron hay naglobo pa sa 954 ro aktibong kaso it makataeapon nga masakit nga ginakaeakipan it 829 nga presenteng una sa facility quarantine; 60 nga naka-home quarantine ag 65 ro admitted.
Samtang, nadugangan man it tatlo ro mga binawian it hueam nga kinabuhi rason nga nagsaka pa sa 84 ro numero it death toll sa Aklan halin kat nag-eopok ro nasambit nga pandemya.
