KALIBO, Aklan—Kapin sa 12 ro binawian it hueam nga kinabuhi sa bilog nga probinsya it Aklan sa sueod it sang adlaw bangud sa covid-19.
Raya hay sandig sa pinakaulihing datos nga ginpaguwa it Aklan Provincial Epidemiology Surveillance Unit it Provincial Health Office.
Bangud kara, nagsaka eon sa kabilugang 165 ro mga namatay bangud sa deadly virus halin kat nag-eopok ro pandemya sa bilog nga kalibutan ko dag-on 2019.
Mag-eowas kara, 168 man ro dugang nga nagpositibo nga ginakaeakipan it sambilog maghalin sa Altavas; tig-lima maghalin sa banwa it Banga, Batan ag Libacao; tig-daywa sa munisipalidad it Buruanga, Madalag, Nabas ag Tangalan; tig ap-at mat-a maghalin sa banwa it Lezo ag New Washington; tatlo sa Ibajay; 19 sa Kalibo; an-om sa Makato; 45 sa Malay; 26 sa Malinao ag 37 sa Numancia.
Angot kara, nagaabot eon sa kabilugang 7,487 ro kaso it covid-19 sa Aklan.
Sa pihak kara, nakalista man it 274 nga panibag-ong nagmayad rason nga humampak eon man sa kabilugang 5,663 ro total recoveries.
Sa makaron hay kapin pa sa 1,385 ro aktibong kaso it deadly virus nga ginamonitor it ahensya nga ginakaeakipan it 1,089 nga una sa facility quarantine, 183 ro naka-home quarantine ag 113 ro admitted.
