Kalibo Aklan —–Naka-uli eon ro kapin sa 129 nga Russian tourists nga stranded sa Isla it Boracay matapos nga maigpit sa ginpatuman nga lockdown sa bilog nga probinsiya it Aklan sa atubang it paeag it coronavirus pandemic.
Suno kay Engr. Eusebio Monserate Jr., manager it Civil Aviation Authority of the Philippines (CAAP)-Aklan nga sangka Russian plane ro nagtugpa sa Kalibo International Airport ag nagsueang sa nasambit nga mga turista sa ginatawag nga mercy flight.
Nasayuran nga nakipag-angot ro Provincial Government it Aklan, Department of Foreign Affairs ag Department of Tourism (DOT) Region 6 sa Russian Government agud nga ma-repatriate ro mga desperado eon nga turista.
Ko nagtaliwan nga domingo, kapinn sa 500 nga lokal ag dumueong nga bakasyunista nga halin man sa Boracay ro nakauli pinaagi sa recovery flights.
Halin sa Caticlan airport sa banwa it Malay hay ginbiyahe sanda paagto sa Clark International Airport sa Pampanga ag naghueat it connecting flights pauli sa andang natungdan nga destinasyon.
Suspindido eon suno kana ro operasyon it Kalibo Airport ag ro ginapasugtan eon lang makaron nga mag-landing hay ro mga medical flights ag repatriation flights .
Ro pagbalik sigon it flight operatios hay nakadepende sa sitwasyon it pagpanaeasa it COVID 19 pandemic .
Mag-eowas sa repatriation flight sa mga Russian tourists hay sangka medical flight pa ro nag-abot kahapon it Philippine Airforce nga nagdaea it mga medical supplies.
